Конфликт с партнёром: история о непонимании и расставании

ссылка

Салгыыта 13:

Оннук этиһэн кэбиспиппит. Ким да иннин биэрбэтэҕэ. 2-3 күн ааспыта. Онтон биир киэһэ кини хомунан баран ханна эрэ барбыта. Соруйан суруйбатым. Саатар кини суоҕар сатаан утуйбат этим, ол иһин түүн буоларын саҕана кэлэр ини диэн күүтэн сыттым.

12 чаас буолла, түүн 1 буолла, түүн 2 буолла, түүн 3 буолла. Киһим суох. Ньиэрбинэйдээн бардым. Уонна хаһан кэлэҕин диэн суруйдум. Киһим сотору соҕус буолан баран «Кэлэн иһэбин» диэн эппиэттээтэ. Түүн номнуо 4 чаас буолан эрэр этэ.

Хайдах эрэ наһаа кыһыйдым. Мин түүннэри мээнэ сылдьыбат киһибин, ол иһин инник сылдьыыны соччо өйдөөбөппүн. Эбиитин эппэккэ барбыт буолан ньиэрбэм ыалдьыбыта. Кыргыттар миигин өйдүүргүт буолуо.

Ол иһин кэлбитигэр...киллэрбэтим. Сылдьыбыт сиргэр баран хон диэбитим. Уонна ааны арыйбатым. Бүттэ.

Онно улаханнык өһүргэммит этэ. Сарсыҥҥы күнүгэр арахсабын диэн суруйбута. «Я решил» диэн буолбута.

Уопсайынан бу маны суруйарым миэхэ билигин да ыарахан. Ол иһин хайдах эрэ уһата сатаатым, ол эрэн буолбут буоллаҕа, билигин кэлэн туох диэхпиний? Олоҕум чааһа буоллаҕа, ол иһин хайдах баарынан.

Ол кэннэ арахсыбыппыт. Мин бастаан синбиир холбоһор инибит дии санаабытым. Ол эрэн киһим олох быһаарыммыт этэ.

Бастаан үс нэдиэлэ курдук күүппүтүм. Баҕар бэйэтэ биллиэ эҥин диэн. Онтон хаста да кэпсэтиэххэ диэн көрсө сатаабытым. Икки ый иһигэр хаста да суруйбутум, ону өссө да кыыһыра сылдьар этэ. Оннук көрсүбэтэҕэ.

Аны эрдэ били Таилаҥҥа билиэт ылбыппыт ди. Ону бииргэ барыахха диэн, онно кэпсэтиэххэ, сыһыаммытын быһаарыахха диэн эмиэ этэ сатаабытым. Суох диир этэ.

Ол сайын элбэхтэ да ытаабытым. Били баттаҕым түһэрэ өссө элбээбитэ. Антиимуннай диэн быһаарбыттара. Төбөбөр укол ылар буолбутум. Ыйдааҕым сүтэн хаалбыта, гормональный сбой буолбут этэ. Төбөм ыарыытыгар кт мозга оҥорон «Инвагинация зубовидного отростка» диэн диагноз туруорбуттара. Арахсыбыт истириэһим доруобуйабар олус күүскэ охсубута.

Олохпун күүспүнэн олоро сатыыр курдук этим. Испэр олох хараҥа, хабыс хараҥа буолбута.

Ол эрэн маннык состояниябыттан аралдьыйаары үлэлээ да үлэлээ буолбутум. Үлэлии сылдьан кыра кэмҥэ умнар курдук этим.

Таилантан кини барбаппын диэн отказтаммыта. Мин хайыырбын өр да өр толкуйдаабытым. Онно чугас дьүөгэм «Олох баран кэл, аралдьый» диэн сүбэлээн соҕотох барарга быһаарыммытым.

Оннук атырдьах ыйын бүтүүтэ соҕотох көппүтүм. Дьиҥэр наһаа үчүгэйдик сылдьыбытым, эрээри синбиир киэһэ аайы ытыыр этим.

Мин санаабар кини дьылҕам этэ буо, биһиги ыал буолуохтаах этибит, оҕолонуохтаах этибит, чааһынай дьиэ туттуохтаах этим. Онтум бу.

Саатар бүтэһик киһилии кэпсэтиибит суох этэ. Баҕар үчүгэйдик кэпсэтэн арахсыбыппыт буоллар арый чэпчэки буолуо эбитэ буолуо... Эрээри кини кэпсэтиэн да баҕарбат этэ.

Төбөбөр ону-маны ойуулаан көрөрүм, хайа түгэҥҥэ сыыһа барбытый, атыны таптыыр ду, баҕар кими эрэ көрсүбүтэ ду эҥин диэн толкуйдаан тахсар этим. Куруук «тоҕо?» диэн ыйытар этим.

Оннук күһүн буолбута. Мин кэлэн баран эмиэ үлэҕэ умса түспүтүм. Эрээри хараҥам хаарыйдар хаарыйан испитэ. Санааҕа ылларарым өссө элбээбитэ. Ол кэмнэргэ балаҕан ыйыгар уонна алтынньыга үлэлэспит бырайыагым харчыларын төлөөн испэккэ сорбун сордообуттара. Иннэ гынан санаам өссө түһэн олох да тостон барбытым.

Ахсынньы, тохсунньу ыйдарга тугу да гыммакка сыппытым. Олох ытыы сылдьар буолан хаалбытым. Общественнай сиргэ кытта сылдьан эмискэ тоҕу баран ытаан барар этим. Испэр олус дириҥ соҕотохсуйуу уонна олоххо кыыһырыы, кэлэйии баара. Ыксаан психиатрга кытта тиийбитим, эмп анаабыттара. Бу санаатахха депрессиялаабыппын быһыылаах.

Ол эрэн олунньу ыйга олох ити турукпуттан тахсарга быһаарыммытым. Кыралаан бэйэбин өрө тарда-тарда хостоон барбытым.

1. Принятие своей слабости. Бастаан бэйэм мөлтөх состояниябын ылыммытым уонна бэйэбин буруйдаан тахсарбыттан босхолонон барбытым. Бэйэбиттэн элбэҕи ирдээбэт буолбутум. Төһө кыалларынан өйдөөн, харыстаан сыһыаннаһан саҕалаабытым. Уруккуттан бэйэбэр баар ожиданияларбын устан быраҕарга күһэллибитим.

2. Опора на себе. «Сардаана, эн билигин ыарахан кэми ааһа сылдьаҕын, үлэлээбэккэ да олороргуттан бэйэҕин буруйдаама». «Сардаана, барытыгар эн буруйдаах буолбатаххын, сыһыан икки киһиттэн тутулуктаах». «Сардаана, мин эйиэхэ баарбын, барытын иккиэн кыайыахпыт». «Сардаана, барыта үчүгэй буолуо». Маннык курдук бэйэбин кытта куруук кэпсэтэр, бэйэбин өйүүр, бэйэбин өйдүүр буолбутум. Бэйэм бэйэбэр опора буолбутум.

3. Жизнь без планов и целей. Туох да былаан, сыал туруоруммат буолбутум. Уонна олохпуттан да, бэйэбиттэн да тугу да ирдээбэт буолбутум.

4. Отдых. Сынньаммытым, сыппытым, үлэлээбэккэ олорбутум.

5. Горевание. Төһө ытыырбынан дэлби ытаабытым. Туолбатах инникибитин, төрөөбөтөх оҕолорбутун, тутуллубатах дьиэбитин саныы-саныы, дэлби ытаан ыытыммытым.

6. Поддержка близких. Доҕотторбор эҥин аһаҕастык кэпсээбитим, аттыбар баар дьоҥҥо арыллыбытым. Кэпсии-кэпсии ытаабытым, аһыыбын үллэстибитим. Өйөбүл ылбытым.

7. Работа с собой. Бэйэбин кытта элбэхтэ үлэлээбитим. Манна сыһыаннаах кинигэлэри аахпытым, ютубка видеолары көрбүтүм. Дохсуҥҥа баран нэдиэлэҕэ хаста да сүүрэрим. Психологияны эҥин хасыһан «пустой стул», «объятия себя» эҥин курдук техникалары оҥортообутум.

8. Психолог. Нэдиэлэ аайы психологка сылдьар буолбутум. Официальнай диагноһым «Эмоциональное истощение уонна Профессиональное выгорание» диэн этэ. Психолог үлэтэ эмиэ көмөлөспүтэ.

9. Принятие. Олоххо араас буолар доҕоттоор. Олох диэн чэпчэки буолбат. Биһиги манна сайда кэлэбит. Онтон маннык курдук ыарахаттар киһини ордук бөҕө оҥороллор эбит. Тимири хатараллар ди, ол курдук. Тимири хатарыы — болгуону аналлаах күөскэ, кыһаҕа ууллара-ууллара, тоҥоро-тоҥоро кытаатыннарыы. ☉ Придание сплаву большей твёрдости путём нагрева и быстрого охлаждения, закаливание. Үчүгэйдик хатарыллыбыт тимир бөҕө туруктаах буолар. Ол курдук үгүс ыараханы ааспыт киһи кыра аайы тостубат, күүстээх санаалаах, бэйэтигэр эрэллээх буолар. Ол иһин олоххо ыарахан баар буолар. Бу барыта биһигини сайыннараары. Маны ылыммытым.

10. Усвоение урока. Мин билигин ити кэннэ бэйэбин харыстыы үөрэммиппин. Бэйэбин эрдэттэн аны инник состоянияҕа тириэрдибэт курдук кыһаллабын. Бэйэбин быдан өйдүүбүн, өйүүбүн.

Бу маннык курдук олунньу ыйга бэйэбин кытта улахан үлэни ыыппытым.

Онтон кулун тутар ыйа буолбута, ону тэҥэ Кэрэ аҥаардар күннэрэ тиийэн кэлбитэ. Арай дьоммор сырыттахпына билбэт нүөмэрим эрийэр да эрийэр. Билбэт нүөмэрдэрбин ылбаппын, ол иһин эппиэттээбэтим. Онтон арай дьиэм домофонугар эрийдилэр. Ким кэллэҕэй диэн төлөппүөммүттэн арыйан көрбүтүм, ханнык эрэ дьээдьэ турар. Сибэккилээх. Кимтэн буолуой?

#сардаанакэпсээнэ

Ол кэмнэргэ айбыт хоһооммун кыбытабын:

Таптыыбын дии сылдьан

Таптыыбын дии сылдьан,

Миигин кытта кэпсэппэккин,

Биир дьиэҕэ олорон,

«Күнүҥ хайдах ааста?» диэн ыйыппаккын

Таптыыбын дии сылдьан,

Бииргэ бириэмэ атаарбаккын,

Аҥардас тымныы сыһыаҥҥынан,

Сүрэхпин күннэтэ ытатаҕын

Таптыыбын дии сылдьан,

Эн миигин кууспаккын,

Аттыбар да сытаҥҥын,

Эн миэхэ чугаһаабаккын

Таптыыбын дии сылдьан,

Тахсан бардын букатын,

Саатар бүтэһик кэпсэтиигэ,

Тылы миэхэ биэрбэтиҥ

Таптыыбын дии сылдьан,

Түргэнник да умуннуҥ,

Биир ый иһигэр биирдэ да,

Ахтан суруйбатыҥ

09.07.25