История любви: как я встретила своего человека

ссылка

Салгыыта 5:

Ол күн киэһэни бииргэ атаарбыппыт уонна сарсыныгар эмиэ көрсүөх буолбуппут. Сарсыҥҥы күнүгэр Праймтаймҥа Том Ям иһэ ыҥырбыта. Сөбүлүүр аһым, ол иһин быһа гыммакка сөбүлэспитим. Наһаа үчүгэйдик аһаабаппыт. Онтон куорат устун дьаарбайбыппыт. Ол кэннэ кини дьиэтигэр барбыппыт. Эмиэ буолары буолбаты кэпсэтэ олорбуппут.

Онно били инстакспын, бэлэхтээбит моментальнай хаартыска түһэрэр камератын илдьэ сылдьабын. Ол олорон хаартыскаҕа түһүөххэ диэн буолбута. Кыбыста-кыбыста онно маҥнайгытын хаартыскаҕа түспүппүт. Ол онно иккиэн түспүт хаартыскабытын көрөн, аһара уйадыйан ытаан эҥин ылбытым. Кини «ньооо» дии дии күлбүтэ эҥин. Аһара дьоллоох этим. Санаабар кырдьык «мин киһим».

Онно-манна барарбытыгар соммун хайаан да кэтэрдэн биэрэр этэ, дьиҥэ мелочь курдук ди, ол эрэн инник ким эрэ харайа сылдьара наһаа астык.

Оннук курдук кыралаан көрсөр буолбуппут, бииргэ онно-манна сылдьар идэлэммиппит.

Кэм кэрдиис ааһан биир күн дьиэбин көрдөрө таарыйа, ыалдьыттата ыҥырбытым. Дьиҥэр дьиэбиттэн наһаа көһөс киһибин, ыалдьыттары эҥин мээнэ ыҥырбаппын, олох чугас дьоммун эрэ киллэрэбин. Кыратык дьон энергетикатыгар эҥин итэҕэйэбин, ол иһин чугастык саныыр, миэхэ куһаҕаны баҕарбат диир дьоммун дьиэбэр киллэрэбин. Ол саҕана ол аата кинини номнуо оннук санаатаҕым ди. Ол иһин ыҥырбытым. Эмиэ киинэ көрбүппүт.

Оннук ыкса билсэрбит элбээн барбыта. Быыһыгар үлэбитигэр да көрсөбүт, үксүн тэҥҥэ аргыстаһан дьиэлиибит. Светофор аайы уураһааһыннаах эҥин. Оннук курдук күн аайы быыс булан көрсөр этибит.

Тапталга уйдарыы да уйдарыы. Омуммар дьиҥ тапталы дьэ өйдөөбүт курдук этим. Эмискэ хааман иһэн олох суолтата таптал диэн түмүккэ кытта тиийбитим.

Холобур наһаа элбэх кинигэ ааҕабыт ди? Как строить отношения? Как воспитать ребенка? Как найти себя? Как быть счастливым? Манна барытыгар эппиэт таптал эбит диэн өйдөөбүтүм. Холобур оҕоҕун ис сүрэххиттэн таптыыр буоллахха үчүгэйдик иитэҕин. Кэргэҥҥинээн таптаһар буоллаххытына сыһыаҥҥыт дириҥии, сайда турар. Бэйэҕин булуоххун баҕарар буоллаххына маҥнай таптыыр дьыалаҕын булуохтааххын. Онтон дьоллоох буолуоххун баҕарар буоллаххына көннөрү олоххун олус таптыахтааххын. Бүттэ. Биһиги бу сиргэ таптыы кэлбиппит. Олох суолтата таптал. Бу маннык санаалар кытта испэр үөскээбиттэрэ.

Оннук сылдьан олунньу ый ортото тиийэн кэлбитэ. Билсэн саҕалаабыппыт номнуо 3 ыйыгар барбыт, кыралаан оҕобун кытта билсэр эҥин туһунан кэпсэтиилэр саҕаламмыттара.

Мин оҕобун сэмээр бэлэмниир этим. Маама доҕордоох эҥин диэн. Кини үчүгэй киһи эҥин диэн кэпсиир этим. Аннараа киһим эмиэ долгуйар аҕай этэ. Оҕону кытта сыһыан сатаан олохтуурум ду эҥин диэн санааларга ылларан ылар этэ.

Оннук сэмээр кыраттан саҕалаан билсэр күннэрэ тиийэн кэлбитэ. Олунньу ый бүтүүтэ. Оҕом ол саҕана 4 саастаах. Киһим оҕобор анаан роза сибэккилээх, минньигэстээх эҥин кэлбитэ. Оҕом эмиэ долгуйбут этэ. Ол да буоллар син тапсыбыттара. Тугу эрэ оонньоспута эҥин. Оҕом оонньуур фотоаппаратыгар кинини эмиэ дэлби хаартыскаҕа эҥин түһэрбит этэ. Оннук курдук этэҥҥэ ааспыта.

Ол кэннэ кэлэрэ-барара элбээбитэ 😅

Оруобуна саас буолан кулун тутарга массыынатын ириэрбитэ уонна наһаа эппиэтинэстээхтик сарсыарда аайы кэлэн биһигини дьыссаакка илдьэр уонна киэһэ аайы дьыссааттан аҕалар буолбута. Олоҕум хас да төгүл чэпчээбит курдук этэ. Ол иннинэ куруук сатыы сылдьар этибит, ол иһин оҕобунаан биһиэхэ ырай олоҕо саҕаламмыта 😂

#сардаанакэпсээнэ