Намысыма тиген ұлттық тақырыптар және тіл мәселесі

1-2 күн бұрын осында бір пост көрдім, тредстан скрин көрсетіліп тұрды және ол жерде қазақ басқа ұлт өкілдерімен (көрші ел қазір соғыс ашып жүрген) қырылысып жатты. Ол жерде қазақтың жазғанына келіскен жоқпын, бірақ басқа ұлт өкілі де өте жаман зат жазды. Ал сол скринмен пост шығарған әйел қазаққа арыз жазамын деп айтып отыр. Оған комментарийде басқа ұлт өкілдері жақтасып отыр, біреуі де екіншісінің айтқаны да дұрыс емес деп айтпады. Жалпы айтқанда, бөлектеніп, өз-өздерін қолдап отыр.

Және арасында осындай комментарий көріп қалдым: “Бізді соншама жек көрсе, неге біздің тілде жазып отыр”. Сол кезде қатты намысыма тиді, мен де коммент жазайын деп едім, постты өшіріп тастапты. Содан кейін тек қазақ тілінде пост жазамын деп шешім қабылдадым.

Кеше жаздым қазақша пост және адамдар күткенімнен де аса жақсы қабылдап, жылы сөздер айтты. Бүгін енді шырша туралы постты қараймын, қайтадан көбіне басқа ұлт өкілдері пост авторына жақтасып отыр, жаңа жыл 16 -желтоқсаннан ерте тойлануына қарсы қазақтармен дауласып, өз ойларымен қаншалықты оларға біздің тарих маңызды емес екенін көрсетіп отыр. Тағы намысыма тиіп отыр.

Барлығы осындай емес деп үміттенемін, бірақ сонда да құрметті қазақ қыздары, келіншектері, апалары, өз тілімізді, мәдениетімізді, салт-дәстүрлерімізді, тарихымызды құрметтейік, бағалайық және балаларымызға да соны үйретейік. Өзіміз бағаламасақ, басқаларға біздің тіл де, тарих та, түкке керек емес.