Что купить первокласснику: список школьных принадлежностей

Үөрэх дьыла күнтэн күн чугаһаан иһэр. Ону тэҥэ маҥнайгы кылааска киирэр оҕолоох төрөппүттэр элбэх ыйытыктаах буолуохтарын сөп. Тус бэйэм санаабын үллэстиэм, баҕар кимиэхэ эмит туһалаах буолуо диэн.

1. Рюкзак. Болҕомтону ыйааһыныгар, материалыгар,быһыытыгар эрэ уурбакка, замогун эмиэ көрүөххэ наада. Рюкзак ордук замогуттан сылтаан алдьанар. Тэҥинэн икки замоктаах табыгастаах. Биирэ алдьанар түгэнигэр, иккиһэ туттуллар.

2. Дневник. Маҥнайгы кылааска сыана турбат да буоллар, дневник син биир ирдэниллэр. Оҕо бэйэтэ көрөн талара ордук. Кини маҥнайгы үөрэх күнүттэн саҕалаан харыстаан илдьэ сылдьыахтааҕын өйдүөхтээх. Дневник оҕону сааһылыыр, бэрээдэккэ үөрэтэр.

3. Тэтэрээт. Хас биирдии учуутал тэтэрээккэ бэйэтэ туспа ирдэбиллээх. Маҥнайгы кылааска 12 лиистээх тэтэрээт сөп буолар. Суруйуу тэтэрээтин элбэҕи ылар табыгаһа суох. Тоҕо диэтэр оҕо кэлин кэтит сурааһыннаах (широкая линия) тэтэрээккэ көһөр.

4. Боростуой харандаас. Оҕо маҥнай харандааһынан суруйа үөрэнэр. Олус сымнаҕас харандаас ылар табыгаһа суох, уһуга субу-субу тостор. Олус кытаанах харандааһынан суруйар ыарахан. Онон кытаанах-сымнаҕас икки ардынан үчүгэй. (НВ).

5. Уруучука. Эҥин араас киэргэллээх уруучука оҕону аралдьытар, түргэнник алдьанар. "Пиши-стирай" уруучуканы соччо ахсарбаппын. Оҕо сыыһатын харандааһынан көннөрө үөрэниэхтээх. Оччоҕо кини туохха сыыспытын тута өйдүүр.

6. Линейка. 15 см линейка үлэлииргэ, тутарга кэбэҕэс буолар. Тимир линейканы ылар сэрэхтээх, мас линейка түргэнник алдьанар.

7. Уһуктуур (точилка). Точилка хайаатар да иһиттээх буолуон наада. Оҕо уруок кэмигэр аралдьыйбакка, атын оҕолорго мэһэйдээбэккэ үөрэнэрин курдук.

8. Сотор. Ластик икки буолара ордук. Олус элбэхтэ сүтэр. Маҥан өҥнөөх ластик ыраастык сотор.

9. Силим. Харандаас клей үлэлииргэ табыгастаах, түргэнник куурар.

10. Альбом. Уруһуйдуур альбом 30-35 лиистээх буолара сөп.

11. Акварель. 12 өҥнөөх акварель биир үөрэх дьылыгар тиийэр.

12. Өҥнөөх харандаастар. Маҥнайгы кылааска күн аайы укта сылдьаллар.

13. Уруһуйдуур киистэ. Киистэни наборунан ылар ордук.

14. Непроливайка. Хаппаҕа үчүгэйдик арыллар-сабыллар буолуон наада.

15. Өҥнөөх кумааҕы уонна картон. Кумааҕылара тус-туспа сылдьара оҕоҕо да, учууталга да үлэни чэпчэтэр.

16. Кыптыый. Уhуга суох, кыра оҕоҕо аналлаах кыптыый ылар ордук. Хаҥастай оҕолорго сөптөөх кыптыыйдар эмиэ атыыга баар буолаллар.

17. Кинигэ уонна тэтэрээт таһа. Билиҥҥи кинигэлэр тастара чап-чараас, түргэнник алдьаналлар. Ол иhин кинигэ тастаах буолара ирдэниллэр.

18. Пенал. Сыл аайы саҥаттан сананы ылбат туhугар, биир үчүгэйи ылан кэбиhэр ордук.

19. Пластилин. 12 өҥнөөх классический пластилин диэн үлэлииргэ үчүгэй. Хайаатар да доска атыылаһыахха наада. Сорох пластилиннар быһахтара суох буолар, эбии ылар ордук.

Уруучукатын, харандааһын сүтэрбэтэх үөрэнээччи диэн суоҕун кэриэтэ. Ол иhин төрөппүт оҕо үөрэнэр тээбириннэрин эрдэттэн бэлиэтээн кэбиhэрэ ордук. Билигин атыыга киhи таптаабыта барыта баар. Дьокуускай маҕаһыыннарыттан үчүгэй хаачыстыбалаах табаардары булуохха сөп. Социальнай чэпчэтии да баар. Маркетплейс табаардарын сыаната күн аайы халбанныы турар, ол иһин барыстаах диэн этэр сатаммат.