История любви: как мы встретились и стали жить вместе

https://mom.life/post/6a1c399f2af0a260430eb1c7

Өйөбүлгүт иһин махтал кыргыттар 🥰

Салгыыта 6:

Кулун тутарга, кэрэ аҥаардар күннэригэр миэхэ Apple Watch бэлэхтээбитэ. Онтун наһаа үчүгэйдик суулаабыт эҥин этэ. Соһуйан хаалбытым. Наһаа махтаммытын.

Арба биири санаан кэллим. Оруобуна кинини көрсүөм иннинэ баттата аҕай сылдьыбытым. Эрэйи көрөр этим. Ол ону барытын кэпсээтэххэ туспа кэпсээн. Ол саҕана үксүн соҕотох бэйэм буккулла сылдьыбыт буолан арааһа аһара тревожнайбын быһыылаах этэ, ол иһин баттатарым буолуо.

Онтон кинини көрсөөт баттатарым лаппа аччаабыта, кырдьык да олус уоскулаҥ турукка кэлбитим. Ол туһунан хоһоон кытта суруйбутум:

Олохпор эн баар буолуоххуттан.

Олохпор эн баар буолуоххуттан,

Олустук да уларыйбыт эбиппин,

Өйдүүн, санаалыын, толкуйдуун,

Уоскулаҥ турукка кэлбиппин.

Олохпор эн баар буолуоххуттан,

Тирэхтээхтик сананар буолбуппун,

Бэйэбэр эрэлим улаатан,

Барытын кыайыах-хотуох курдукпун.

Олохпор эн баар буолуоххуттан,

Истиҥ доҕордоох буолбуппун,

Толкуйдарбын үллэстэр киһилэнэн,

Соҕотохсуйары умнубуппун.

Олохпор эн баар буолуоххуттан,

Дьиҥ тапталы билбиппин,

Хараҥа да хаарыйбат,

Сырдык турукка кэлбиппин.

19.03.24

Салгыы оннук ыйдар устан испиттэрэ. Уол субу-субу сибэкки бэлэхтиирэ. Бу санаатахха атаахтаппыт аҕай эбит.

Үксүн киэһэлэргэ миэхэ сылдьар буолан барбыта. Араас буолар буолбат сериаллары көрөр этибит. Астанан аһыырбыт. Онтон кини утуйар саҕана дьиэлиир этэ.

Биирдэ оннук сылдьан мин ыалдьан хаалбытым, онно тутатына тиийэн кэлбитэ уонна наһаа минньигэс куурусса миинин буһарбыта. Онно эмиэ наһаа үөрбүтүм.

Оннук ыйдар ааспыттара, номнуо ыам ыйа буолбута. Сыл аҥаарыгар чугаһаабыппыт. Бииргэ олорор туһунан толкуйданан барбыппыт. Онтон ыам ыйын ортото кини биһиэхэ көһөн кэлбитэ. Бастаан кыралаан таҥаһа кэлбитэ, онтон рабочай остуола, кириэһилэтэ, кинигэлэрэ.

Онно бириэмэбитин наардыыр буолбуппут. Нэдиэлэҕэ иккитэ-үстэ дьарыктанабыт. Киэһэлэрбитин эмиэ туһалаахтык атаарарбыт. Сорох күн тэҥҥэ олорон үөрэнэбит, сорох күн сериал / киинэ көрөбүт. Инник гынан иккиэн тэҥҥэ сайдар уонна сынньанар этибит.

Ол быыһыгар мин сайт оҥорорго сакаас ылбытым. Онно илии-атах буола көмөлөһөн саҕалаабыта. Олус түргэнник ылынан, ол сакаас биир разделын бэйэтэ оҥорбута. Онтон хараҕа уоттанан саайт оҥорор өттүн үөрэтэн саҕалаабыта.

Оннук курдук кыралаан биир хамаанда буолан барбыппыт.

#сардаанакэпсээнэ