Как я повзрослела за один год: личная история

Саҕаланыыта 1:

Киһи олоҕор ыараханы көрсөн, эбэтэр кимин эрэ сүтэрэн, эбэтэр туох эрэ түгэн кэнниттэн — эмискэ улаатар. Күлүмүрдүү, күлэ сылдьыбыт, олоххо чэпчэки сыһыаннаах киһибит ыараабыкка дылы, эбэтэр туохха эрэ баттаммыкка дылы буолар.

Мин олохпор эмиэ оннук түгэн кэннэ эмискэ улааппытым. 30 сылы супту күлэ-үөрэ, мэниктии сылдьан, санааҕа ылларан, хараҥаҕа хаайтаран, биир сыл иһигэр оннооҕор кырдьыбыкка дылы буоллум.

Ол туһунан кэпсиэм. Саҕалыам иннинэ, бука баһаалыста ханна да ыытымаҥ диэн көрдөһүүлээхпин 🙏🏼

Бу кэпсээн испэр буһан билигин бэйэбин баттыыр, иннэ гынан, «эмтэнэ» таарыйа манна суруйан хаалларыам. Баҕар кимиэхэ эмит уруок буолуо. Баҕар ким эмит көннөрү ааҕан, тугу эмит өйдүө, ылыныа.

2023 сыл. Мин 28 саастаахпын. Олоҕум күөстүү оргуйа турар, сөбүлүүр харчы киллэрэр дьарыктаахпын, үгүс доҕоттордоохпун, оҕобун соҕотох да буоллар, син бэрткэ улаатыннаран иһэбин.

Ол эрэн кэргэн диэн суох, испэр сэмээр бэйэм дьиэ кэргэннэнэр туһунан олус ыралыыр этим. Кэргэним хайдах киһи буоларын, хайдах сыһыаннааҕын, омуннаан эттэххэ хайдах дьүһүннээҕин кытта заметкаларбар суруйбутум. Санаабар хаһан эрэ баҕа санаам туолар, маннык киһини көрсөр инибин диэн эрэнэр этим.

Эр дьон, уолаттар внимание уурар этилэр, ол эрэн ол заметкабар суруммут уобараспыттан атын буоллаҕына кэпсэтэ да барбат этим. Дьиҥэр ол саҕана оҕом аҕатыттан арахсыбытым номнуо 3 сыл ааспыт, ол тухары кимниин да сыһыан олохтуу сатаабатаҕым.

Оннук курдук сылдьан 2023 сыл саас саҥа үлэҕэ киирбитим. Оруобуна бэйэбэр барсар үлэ буолан наһаа астынан үлэлээн саҕалаабытым. Коллектив эҥин астык. Эрээри договорунан. Бастаан 3 ыйга договордаспытым, онтон күһүөрү онтубун саҥа дьыл бүтүөр диэри уһатар буоллулар.

Ол уһатыы дьыалатыгар мин кинилиин аан маҥнайгытын алтыспыппыт. Бастаан ватсаабынан, онтон кэлэн подпись туруора диэн кинилэр отделларын кабинетыгар тахсар буолбутум.

Август ый буолан дьыссаат үлэлээбэт, иннэ гынан оҕобун илдьэ сылдьан үлэлии сылдьабын. Оннук иккиэн соһуллан, айманан, тэрилтэм саҥа зданиятыгар тахсыбыппыт. Үөһээ тахсан оннук же субуруһан подписьтыы киирбитим уонна ол подьписьтатар уолу санаабар сөбүлүү көрбүтүм.

Ол оннук ааспыта. Күһүн ааста. Кыһын буолла. Мин үлэ бөҕө. Улахан тэрээһин ыытабыт. Туох баар докумуон аны ол уол нөҥүө барар, киниэхэ субу-субу докумуоннары ыытабын, иннэ гынан кыралаан алтыһар, билсэр буолан бардыбыт.

Онтон аадьуо уол ол үлэ тула кэпсэтиилэргэ сэмээр сүрэхтэри эҥин туруорар буолла...

#сардаанакэпсээнэ