Темперамент оҕо: сангвиник, флегматик, холерик хайдах бэлиэтэнэр

*Оҕоҥ хайдах темпераменнаҕый?*

*Сангвиник*

Бу оҕо олоҕу таптыыр. Кырачаан барытын билэ-көрө сатыыр. Кини ис-иһиттэн интэриэһинэй, дьону кытта түргэнник биир тылы булар. Тоҕо диэтэххэ, кини хадаара суох уонна куһаҕаны өр бэйэтигэр тута сылдьыбат майгылаах. Кини- оптимист. Кини сылдьарын тухары олох үчүгэй өрүттэрин эрэ бэлиэтиир. Сангвиник ханнык эмэтэ дьарыкка түргэнник ылларар, оннук түргэнник атыҥҥа көһөр. Дьон-сэргэ иһигэр эрэллээхтик тутта сылдьар. Баай, уус тыллаах, саҥарарыгар илиитинэн эмиэ хамсанар. Маннык темпераменнаах оҕо түргэнник хаппырыыстаабакка утуйар. Куһаҕан настырыанньалаах турдаҕынан, түргэнник аһарынар.

*Флегматик*

Флегматик ханна да ыксаабат, сүпсүлгэни сөбүлээбэт. Атын оҕолор быыстарыгар кини бытаанынан уонна мөдөөн хамсаныытынан чорбойор. Ол эрээри, сорох улахан дьоннооҕор кини дьоһун толкуйдуур дьоҕурдаах буолар. Кини хаһан да саҥа уонна билбэт дьыалатыгар кыттыа суоҕа, урукку билэр ньыматыгар бэриниилээх буолуоҕа. Туруоруммут сыалын хайа да балаһыанньаҕа дьаныһан туран ситиһэр. Флегматик оҕо холку, кинини ньиэрбинэйдэтэр уустук. Бэйэтин санаатын таһыгар биллэрбэт оҕону дьон нэс дии саныыллар. Ол гынан баран уйадыйдаҕына таһыгар таһаарар. Флегматик оҕо дьоҕуру булара ыарахаттардаах, өскөтүн кими эмэ кытары доҕордостоҕуна, кини бэриниилээх доҕор буолар. Флегматик бытааннык ылынар, ол оннугар ол ылыммыт үөрэҕэ үйэтин тухары туһанар.

*Холерик*

Психологтар холерик оҕону гиперактивнай диэн ааттыыллар. Холерик биир сиргэ таба олорбот, олус энергичнэй. Кини оҕолор быыстарыгар сүгүн сылдьыбат, кими эмэ охсубут-тэппит, ытаппыт буолар. Ханнык баҕарар дьыаланы умсугуйан туран ылсар уонна түргэнник уостар, атын интэриэһинэй дьарыкка көһөр. Кини сир туллубат тутааҕа хайҕанарын сөбүлүүр. Түргэн туттунуулаах, улахан саҥалаах тылын сорох сүһүөхтэрин “ыйыстан”кэбиһэр.

Оҕолорго холерик лидер, бииргэ оонньуур оҕолорун кытта сатаспат, ол эрээри, кинилэрэ суох сатаммат. Кэтэһэрин, бэйэтин баҕатын кыана туттарын сатаабат. Холерик коллективка тургэнник киирэр, ол гынан баран сотору буолан баран этиһэн арахсар. Кини бэрээдэги үксүгэр тутуспат. Муннукка туруордахтарына, ытаан-соҥоон, хаһыытаан туран, иннин биэрбэт.

*Меланхолик*

Бу оҕону теплицаҕа үүннэриллибит үүнээйини кытта тэҥниэххэ сөп. Олус уйан, чараас дууһалаах. Киниэхэ туһаайан кыратык даҕаны куоласкын сонотон, саҥардаххына, хараҕа ууланар. Кини туох баар саҥа хамсааһынтан уонна билбэт дьонуттан куттанар. Майгытын биир билиэ өрүтүнэн килбик, кыбыстанньаҥ уонна бэйэтигэр эрэлэ суоҕа буолар. Меланхолик үксүгэр пессимст буолар, бэйэтигэр эрэммэт, “тугум да сатаммат” диэн мэлдьи үҥсэргии сылдьар. Ханнык баҕарар үлэни кини улахан эрэйинэн толорор,түргэнник сылайар. Дьиҥинэн, меланхолик оҕолор улаатан истэхтэрин аайы үөрэҕи түргэнник ылыналлар. Ол гынан баран, ол билбиттэрин өйдөрүгэр хатаабаттар, түргэнник умналлар. Кырачаан хамсаныыта эрэлэ суох, чуумпу, ол гынан баран хомоҕой санаалаах буолар. Меланхолик кэпсэтэр киһитэ хайдах майгылааҕын, бу түгэҥҥэ хайдах настырыанньалаах олорорун курдат таайар буолан, олус үчүгэй доҕор буолар.