Кэнэҕэски туһунан билии - оҕо төрөөбүтүн үһүс хонугар сиэр-туом

КЭНЭҔЭСКИ туһунан түүлбэр да баттатан көрбөт этим.

Төрүүрбэр кэнэҕэским эрдэлээн кесаревтаммытым. Онтон кэнэҕэским сорҕотун хаалларан кэбиһэннэр осложнениелаан ый курдук балыыһаҕа сыппытым. Билиим-билсиһиим оннук эрэ этэ. Былырыын Анхелинаны көрсүөхпэр диэри. Дьэ, онтон саҕалаан КЭНЭҔЭСКИ туһунан элбэҕи үөрэтэн биллим.

Кэнэҕэскини ААЛ ЛУУК МАСКА холууллар. Кини үс дойду таһымыгар дьайар. Киһи этигэр-сиинигэр, сэниэтигэр-сылбатыгар, өйүгэр-санаатыгар барытыгар дьайар. Кэнэҕэски ытык суолталааҕын, дьиҥ сиэрдээх билиини илдьэ сылдьарын бары кэриэтэ омуктар билэллэр эбит. Кини бэйэтин тутулугар АЙЫЛҔА БИЛИИТИН иҥэринэ сылдьар. Оҕо үөскээтэҕинэ ийэ кутун уонна буор кутун аһаппытынан барар. КИҺИ ӨБҮГЭЛЭРИН КЫТТА СИТИМИН ТИРЭҔЭ БУОЛАР. Кэнэҕэскиттэн тирэҕирэн киин нөҥүө саҥа олох үөскүүр. Кэнэҕэскигэ киһи кута-сүрэ олорор диэн сорох омуктар итэҕэйэллэр. Сорох омук бу дьикти оргаҥҥа биһиги өбүгэбит билиитэ, кута-сүрэ олорор диэн этэллэр.

ОНУ САХА ОМУГА ЭМИЭ БИЛЭР ЭТЭ. Кэнэҕэскитин кытта ситимэ суох киһи өбүгэтин кытта ситимэ уонна харысхала суох буолар. Онон дьахтар төрөөбүтүн үһүс хонугар анаан сиэр-туом оҥоһуллара. Кэнэҕэскини сиргэ көмөн СИР ИЙЭҔЭ саҥа олох кэлбитин туоһулууллара. Сир Ийэни кытта ситимнэһэн буор кута бөҕөргүүрэ. Сиргэ тирэхтээн биэрэллэрэ. Бу сир киһиэхэ күүс биэрэр сирэ буолара.

Маны билиэхпиттэн санааҕа түспүтүм. Тоҕо да эрдэ билбэтэхпиний, оҕолорум кэнэҕэскилэрэ таах быраҕыллан хааллахтара диэн. Ол эрэн билигин суолу тобулан олоробун - киһи кэлин даҕаны бу сиэри-туому оҥоруон сөп эбит диэн. Онтон эһиги туох дии саныыгытый?