Көмүһүөм, чыычааҕым,

Кып кыракый уолчааным,

Минньигэстик утуйуон,

Аптаах түүллэри түһүөн.

Мин күнүм, сулуһум,

Мин модун боотурум,

Түүлгэр үрдүк дабайыан,

Былыттары таарыйыан.

Мин сырдык тапталым,

Мин оҕом _____.

Иэдэскин сыллаан ылыам,

Төбөҕүн имэрийиэм.

Ийэ түүлгүн харыстыа,

Эн түргэнник улаатыан.

Сып сылаастык мин кууһуом -

Эн дьоллоох киһи буолуон.

Бу олох кэрэтин,

Орто дойду күндүтүн

Эн бэйэн көрүөн, билиэн,

Мин өйүөм уонна сиэтиэм.

Онтон бу чуумпуу түүҥҥэ

Кып кыра оҕом сыыһа,

Ырыабын истэн уоскуйууй,

Илиилэрбэр утуйууй.

Ийэн күүстээх таптала

Эйиигин харыстыаҕа,

Сүрэхчээнин иһигэр

Бигэ тирэх буолуоҕа.