Сан де Ц1а: Хьох 1аьбнарг мила ву?

Сан де Ц1а.

Сан хьоме де Ц1а -

Сан мерза кхерч,

Сан са ду даима хьоьца.

Йог1у со хьан кхерча

Марзонах 1аба,

Жималла сайн карлаяккха.

Хьомсара да-нана

Даьхначу керта,

Йог1у со доггаха

Парг1ат са даккха.

Д1аяхна жималла

Сайн карлаяккха.

Дайнарш а, лайнарш а

Ойланехь листа.

Сан де Ц1а -

Ма ч1ог1а марзо ю хьоьца.

Да-нана, йиша,

Хьоме ваша.

Д1аяха мерза хан

Кхин юха ца ян,

-Эх1! Маржа я1! -

-Дуьне хьо, -

Дахар хьан доца ду.

Хьан марзо мерза ю,

Хьох 1аьбнарг мила ву?

Хаттар сан хьоьга ду.

Дуьнено 1ехаво,

Шайт1ано тилаво.

1ожалло тешнабехк,

Ма ч1ог1а сиха бо.

Цундела сан де Ц1а -

Сан марзо хьоьца ю.

Кхоьру со, сан де Ц1а,

Хьох хаьдда йисарна.

Корта сан сирбелла,

Шен лааме дег1 кхийда.

Амма дог д1аг1ерта

Йиш-веши марзоне.

Сан хьоме де Ц1а,-

Сан мерза кхерч,

Сан са ду даима хьоьца.

Йог1у со хьан кхерча

Марзонах 1аба,

Йог1у со доггаха

Парг1ат са даккха,

Хьан марахь яла сатесна.