*👶🏻👧🏻Оҕоҕун сатаан иитиэҥ - олох дьолун билиэҥ*

Туора киһини ытыктыаҥ - бэйэҕин ытыктатыаҥ

Тыалынан киирбит холоругунан тахсар: биири атаҕастыаҥ, иккистэн эн эстиэҥ

Кимиэхэ да куһаҕаны баҕарыма - күн сиригэр онтон ордук куһаҕан суох

Киһини сэмэй, сиэрдээх быһыы киэргэтэр, өйдөөҕүмсүйүөҥ - күлүүгэ элэккэ түбэһиэҥ

Улахамсыйыы - бэйэ кыра ычалааҕын билинии

Өйдөөҥ: өйү өй, күүһү күүс баһыйар

Айылҕаттан атаҕастаммыттары аһын

Ол үтүө санааҥ эйигин алдьархайтан араҥаччылыа

Дьон оҥорбутун туппутун алдьатыма. Онно иҥмит илбис эйиэхэ түһүөҕэ, куккун-сүргүн тоһутуоҕа, оноһуугун быһаҕас оҥоруоҕа

Биирдэ уоруоҥ - үйэҥ тухары уорбаланыаҥ

Кырдьаҕастары сэнээмэ, күлүү-элэк оҥостума. Киһи күннээх, балык ыамнаах дииллэрин умнума

Дьон босхотугар суудайымаҥ, туох барыта иэстэбиллээҕин умнумаҥ

Киһи кэрэмэһэ, ыал бастыҥа буолуоххутун баҕарар буоллаххытына, көнө санааны көнтөс гыныҥ, сурэхтээх-бэлэстээх буолуҥ. Сарсыарда күҥҥүтүн эрдэлээн саҕалааҥ. Эрдэһит чыычаах сыа аһылыктаах, хойутаабыт чыычаах хараҕын хастар дииллэрэ кырдьык

Айылҕаны, кыылы-сүөлү бэйэҕит курдук санааҥ. Кинилэргэ биһиги куппут иҥэ сылдьар. Хабыр, иҥсэлээх быһыы син биир бэйэҕин ситэн иэстэһиэҕэ.

Биһиги мындыр өбүгэлэрбит итини чуолкайдык билэллэрэ.

Ол өйтөн оҥоһуу буолбатах - тыһыынчаннан сыллаах олоххо кэтээн көрүү түмүгэ