Как правильно читать духа-намаз? Время и достоинства
ДУХЬÁ ЛАМАЗ
Къинхетаме а, къинхетам беш а волчу АллахIан цIарца!
– Довзийтар: духьа ламаз – иза малх хьалабаьллачул тIаьхьа делкъа
хан кхаччалц йолчу юкъахь деш долу суннат ламаз ду. Вайн наха
цхьаболчара «зухьа» а, «зуьхьа-ламаз» а олу цунах.
– Хьукм: духьа ламаз чIагIдина суннат ду, дар вуно чIогIа деза
долуш.
– Дозалла: адаман дегIан хIуттургашна хIора денна тIедожийна долу
сагIа кхочуш хуьлу духьа ши ракаIат ламаз дарца. Духьа диъ ракаIат
динчунна, АллахIа цу денна Ша массо а хIуманна кхачам бийр бу
аьлла. Цуьнан дозалла дуьйцуш кхий а дуккха хьадисаш даьхкина.
– Хан: Iуьйранна малх схьакхеттачул тIаьхьа 10-15 минот яьлча
дуьйна, делкъа хан хила пхи минот гергга йиссалц. Ткъа цуьнан
уггар еза хан – де диъ де́къе декъча, доьххьара доьалгIа дакъа дIа а
даьлла, шолгIа доьалгIа дакъа доладелча ю. (Де – Iуьйра-ламазана а,
маьркIаж-ламазана а юкъахь йолу хан ю)
– РакаIаташ: лаххара барам ши ракаIат бу, лакхара барам бархI
ракаIат бу, хIора ши ракаIат дIадаьлча салам а луш. Луучо ши ракаIат
дан а мегаш ду, диъ дан а мегаш ду, ялх дан а мегаш, ткъа уггар
Из дезаниг бархI ракаIат дар ду.
– Куц: духьа ламаз кхидолу ламазаш санна деш ду. Шина ракаIатал
сов дечо хIора шина ракаIатехь салам а луш. Духьа ламаз ша цхьам
дар суннат ду, жамаIатца дар суннат дац.
– Некъахь волуш дар: духьа ламаз некъахь волчо а дича дика ду.
– Доькхуш дар: духьа ламаз ца деш диссинехь, иза муьлхха хенахь а
доькхуш дар дика ду.
«Ал-МаджмýI» Имам Ан-Нававий: 4/35-40, «НихIайатул-Мухьтáдж» Имам Ар-Рамлий: 2/116-118,
«Шархьул-Махьаллий Iалал-МинхIáдж» Имам Ал-Махьаллий: 1-229-230, «Тухьфатул-Мухьтáдж» Имам
Ал-ХIайтамий: 2/231-233, «МугIнил-Мухьтáдж», Имам Аш-Ширбúний: 1/455…
Кхузахь хаа деза, духьа ламазан цхьадолчу хIуманаш тIехь Iелам-нахана юкъахь –
мазхIабашкахь – цхьацца хилпалонаш юйла, кхидолчу Iибадаташкахь санна. И
хилпалонаш хиларан бахьанаш дукха ду, ткъа вайна коьрта хаа дезарг хIун ду: хIора
мазхIабан дайша олуш дерг а, деш дерг а пайхамаран ﷺ суннат дезаш, олуш а, деш а
хилла, хIораммо а шен-шен иджтихIáде хьаьжжина.
