Встреча с Жеткеном

Қыздың әкесі Жеткен Бақұлы танысуға келген жас жігітті сонша тергеймін демеген еді. Бәйбішесі күнара «Мөлдіртайдың көңілі қалаған жігітімен танысып, батаңызды берсеңізші. Туыстары алдымыздан өтпекші» деп қылқылдап қоймаған соң, қызына көз салған жігітпен танысу деген салтта жоқ әдет болса да, «заман басқа болды ғой, жарайды, таныссам танысайын» деп келісімін беріп еді. Арада күн өткенде осы сырықтай жігіт келді Мөлдірге еріп. Тікірейген қара шашы, бүркіт қабағы мінезінің қайратты екенін бірден байқатты. Алдымен өткір жанары жарқ етіп: «Сәлеметсіз бе» деп амандасты. Ер азаматтың «Ассалаумағалейкум!» деп қазақша қол ұсынбағанына үлкен кісі кіділеніп қалды. «Қазіргі жастар қазақша амандасқанды біле де бермейді-ау» деп ойлады, өзіне университеттегі студенттердің «сәләмәтсіз» дей салатынын еске алып. Алдымен дүрбімен қарағандай бастан-аяқ шолып шықты. Сымбатына көзі тойған соң, жігітті кабинетіне қарай бастады.

Жігіт аздап қысылғанын байқатып, екі аяғын қосып, бойын тік ұстап отырды. Екі қолы алдында. Жеткен Бақұлы алдымен өзін таныстырып:

– Мен Мөлдірдің әкесімін. Есімім – Жеткен, әкемнің аты – Бақ болады. Өзіңнің аты-жөнің қалай? - деді.

– Нұржан Қалқабаевпын,- деді жігіт, аудиторияда отырған студентіне ұқсап.

– «-ов» пен «-ев» сияқты сүйкімсіз жалғаудан әлі құтылмағансыңдар ма? - деді профессор қиқар мінезінің шетін көрсетіп.

– Құжатта солай рәсімделіп кетіпті,- деді бала, басқа не десін.

– Әлі де кеш емес, оны түзетіп ал. Қай жақтың қазағысыңдар?

– Осы маңайдан, таудың арғы жағынанбыз.

– Әке-шешең елде ме, жоқ қалаға жақындады ма?

– Әкем жоқ, анам бар. Қаланың маңындағы ауылда тұрады, - деді жігіт, үні алғашқыдан бәсеңдеу шығып.

– Әкең қайда? Қай тума боласыңдар? - үлкен кісі енді бастырмалата жөнелді.

Осы жерде жігіттің жүзі қызарып, дауысы тіпті шығар-шықпас:

– Менің әкем жоқ, жалғыз анам бар,- деді.

– Әкем жоғы несі. Ажырасқан ба, не дүниеден өткен бе? - деп қыз әкесі тықақтап қояр емес. Жаңа ғана денесін тіп-тік ұстап отырған азамат белінен біреу періп қалғандай көз алдында сылқ етті. Үндемей сәл отырған соң, мына кісінің алдында ешнәрсені жасыруға болмайтынын ұғып, сауалға жауап беру керектігі есіне түскендей үнін әрең шығарып: