Что происходит с Дадой?

Дада

Бежанаш оьзна со яьлча, уьш д1алахка Дада воьдура...Жимма вола а луш, ша воьду, хьан г1уллакхаш дукха ду олий бехказло а хьовзайора пекъаро...

Гуьйренан йочанаш юьйлаелча, мелла а хьелора Дада чуван...чай кхехкон а,хьокхам батта а ларайора со и схьакхачале.

- Хьо ма хьевели? - олуш, дуьхьалйолучу суна х1оразза а:

- Хьажал, ас хьайна х1ун еана? - олий, кисанашкара б1араш хьаладохура Дадас. Б1араш цкъа суна гайта а гойтий, со царах х1оразза а г1адъяхча, пеша хьалха а хуий, ша кегдора уьш..."х1ара т1ум а якъаялаза ю хьуна...х1ара а т1еда ю...хьажал, х1ара мел хаза схьаели.." - бохуш...

Дукха хан ю цу пеша хьалха со ца хьийза а...Дада воцу а...и пеш юй а ца хаьа х1инца...

Амма х1оразза а гуьйренан йочано эгийна б1араш гича, пеша хьалха 1аш хилла воккхастаг х1утту б1аьргаш хьалха...

Ма доккха ши миска хилла-кх тхойшиъ..."Хьо ма хьевели?" - дуьхьалъяла со хиларх воккхавеш хан яхана цуьнан а, цо сайн дуьхьа гулдинчу б1арех г1адъоьхуш хене со а йийлина...

Т1аккха а...миска а ца хилла-кх тхойшиъ...дуьненчохь ша т1аьххьара даьхначу сахьташкахь а цо со лехна, кху ткъа шарахь "Дада" аьлла ша хьахавелча, хазахетар бен, халахета дагалаца х1ума цо суна а ца дитина...

Нус хилла цунна хьалха хьийза ирс хиллачу суна дика да хилира Дадех...хийла сайна хилла цатам цуьнан дуьхьа ас а хьулбира...

Иштта д1аяхар-кха и хан...ша кегдечу б1арашца Дадас сан хораман шеддаш а дашош, баркаллица и т1амарш юучу ас цунна синтем а луш...сайн къина и бехке ца хиларна даре а деш...)