Кто такой Аллах1 и каковы Его атрибуты?
Аллах1 Дела вовз хьайн лаахь 👇🏻
💫🌙Аллах1 цхьаъ ву, накъост воцуш,
Шен халкъ лелор шегахь долуш.
Накъост воцуш, тера х1ума доцуш,
СубхьанаЛлах1, СубхьанаЛлах1!
Азаллехь Ша хилла волуш,
Шен хиларехь хьалхе йоцуш.
Шен висарехь даим волуш,
СубхьанаЛлах1, СубхьанаЛлах1!
Цхьанна х1умане хьашто йоцуш,
Дерриге халкъ Шега хьашт долуш.
Ша кхоьллинчех тера воцуш,
СубхьанаЛлах1, СубхьанаЛлах1!
Шен хиларехь меттиг йоцуш,
Меттиг кхоллале хилла волуш.
Меттиге Ше хьашто йоцуш,
СубхьанаЛлах1, СубхьанаЛлах1!
Аллах1 воцург 1алам ма ду,
И кхоьллинарг Дели ма ву.
Ша кхоьллинчун т1е нисвеш ду,
СубхьанаЛлах1, СубхьанаЛлах1!
Пхийттара ваьлла хьекъал долчу,
Лайна т1ехь ду, Аллах1 вовзар.
Декъал хилар дог1у ма ду
СубхьанаЛлах1, СубхьанаЛлах1!
Хезаш ву Хьо доза доцуш,
Гуш ма ву Хьо дуьхьало йоцуш.
Хьайн сипатах тера х1ума доцуш,
СубхьанаЛлах1, СубхьанаЛлах1!
Харжам бу Хьан кхолла, кхалхо,
Ницкъ болуш ву Хьо харжам лело.
Ахь динчунах хатта да вац,
СубхьаналЛах1, СубхьаналЛах1!
1илма ду Хьан доза доцуш,
Массо х1уман гуо бар долуш.
Хиндерг, хилларг хаар долуш,
СубхьаналЛах1 СубхьаналЛах1!
Къемат-дийнахь гойтур ву Ахь,
Меттиг йоцуш, аг1о йоцуш.
Тхан хьекъалаш т1е кхуьур доцуш,
СубхьаналЛах1, СубхьаналЛах1!
Къамел дийр ду, хезаш волуш,
Хьайн къамелах тера х1ума доцуш.
Хьарпаца доцуш, озаца доцуш,
СубхьаналЛах1, СубхьаналЛах1!
Ахь Къуранчохь хьахийна долчу,
Элчанна матта т1ехь лелла долчу,
Хьан сипаташца ийман дуьллу,
СубхьаналЛах1, СубхьаналЛах1!
Уьш бакъ хилар дагца бакъдеш,
Хьо цхьаъ хилар маттаца ч1аг1деш.
Ахь кхоьллинчех, Хьо тар ца веш,
Ийман дуьллу хьоьга, Аллах1-Дела!💫🌙