Поликлиникаҕа оҕолорбун кытта такси күүтэ олордубут. Биир ийэ киирдэ. Ачыкылаах, үөрбүт дьүһүннээх ийэ, конверга бойбоччу сууламмыт оҕолоох. Оҕото 3-4 ыйдаах быһыыта.

Оҕотун сэрэнэн пеленальнай остуолга сытыарда, кыратык тас таҥаһын сүөрдэ уонна бэйэтин курткатын, бэргэһэтин уһулла. Ол тухары оҕотугар наһаа үчүгэй тыллары этэр: "Ханна-ханна кэллибит?", "Оҕону дэлби танныннарбыттар дуо", "Тиритээри гыннаҕын","Билигин бу сыгынньахтаныам уонна эн таҥаскын эмиэ устуом","слаадкий мой". Чэ инник араастаан таптыы-таптыы, хас биирдии хамсаныытын саҥара, быһаара наһаа үчүгэйдик таҥастарын устан коридорунан бара турбуттара.

Онно санаабытым. Бу сылдьар эбит: психологияҕа этиллэр "мама отражает ребенка" диэн.

Оҕо тулалыыр эйгэни кыра эрдэҕинэ ийэтин нөҥүө ылынар. Ийэ сымнаҕас куолаһынан барытын быһаара, "озвучкалыы" сырыттаҕына оҕо ону өйдүүр, билбэт эйгэтиттэн куттаммат, ордук холку буолар дииллэрэ ити сылдьар эбит. Оҕото чахчы олус холку этэ.

Оттон аны аҕыйах күнүнэн эмиэ поликлиникаҕа сырыттыбыт. Эмиэ такси күүтэ олордубут😂

Биир ийэ оҕотун таҥыннарар. Оҕото 4-5 ыйдаах быһыыта. "Түргэнник сыта оҕус", "хаппырыыстаан бүт","ити баар дии, сүгүн сыппаккаҕын сатаан курткаҕын замоктаабаппын","сөп буолуо кыҥкыйданан". Оҕото ону өйдүө дуо. Кып-кырачаан киһи ыксыыллар эрэ, хойутууллар эрэ, наадыйбат онно. Арай ийэтэ ыгылыйбыт, кыыһырбыт куолаһыттан ытыах эрэ санаата кэлэр. Оннук курдук хомунан ытаабытынан тахсан бардылар.

Мин инник эмиэ буолааччыбын. Сороҕор көннөрү саҥата суох ийэ эмиэ буолааччым оҕолорум эһээхэй эрдэхтэринэ, барытын "молча" гынар 😂

Оттон саамай үчүгэйэ, сатанар буоллаҕына, эһээхэй оҕоҕо барытын быһаара, үөрбүтүн-хомойбутун, оҕо тугу баҕарбытын (аһыан, саахтыан, оонньуон, ийэтин кытта кэпсэтэ түһүөн) "отражайдыы" сылдьыы быһылаах.