#Хаттар60

Ассаламу Iалайкум варахьматуллахIи вабарокатухI. Сан хаттар ишт ду: Истихарат ламазан куц муха ду? оцу ламаз хьокъехь дика кхетош жоп лахьар, АллахIа диканца бекхам бойла шуна.

-

ваIалайкумуссаламу варахьматуллахIи вабаракатухI.

Истихарат бохучу дешан маьIна: Харжам лахар ду; АллахIана гергахь хьуна дика долчу хIумане хьан ойла нис яр дехар ду.

Истихарат ламазан куц: Бусалба стага шен цхьа хIума дан ойла кхолла елча, зуда яла яр хуьлийл иза, йа некъа валан ойла хуьлийл иза, йа и санна долу муьлха а кхин хIума дан ойла кхолла елча, суннат ши ракаIат ламаз дийр ду, тIаккха дуIа дийр ду - салам далле, йа салам деллачул тIехьа - АллахIега доьхур ду шега гIолехь дерг харжийтар, шех вониг дIахьовзадар.

Истихарат ламаз диначул тIехьа: Шена гIолехь хеташ дерг, шен даго къобул дийриг дийр ду. Нагахьсан цултIехьа а гIолехь дерг билгал делла дацахь, шена билгал даллалц истихарат юх-юха а дийр ду.

Истихарат ламазан хьукма: Иза суннат ламаз ду. Иза Асхьабаш даиман деш лелийна ду.

Жабир бин IабдуллахIа (АллахI реза хуьлда цунна) аьлла: "Пайхамара (саллаллахIу IалайхIи васаллам) тхуна Iамадора массо хIуманна тIехь истихарат (дикачунна тIенисвар доьхуш долу ламаз) дар, ша тхуна Къуръан тIера сурат Iамадаре тера. Цуо олура: «Шайна цхьа хIума дан дагадеанчо ши ракаIат (ламаз) де аш, фарз ламаз а доцуш (суннат ламаз). ТIаккха цо ала: «АллóхIумма инни́ астахи́рука биIилмик, ва астакъдирука бикъудратик, ва асъалука мин фадликалIази́м, фаиннака такъдиру ва лá акъдир, ва таIламу ва лá аIлам, ва анта IаллáмулгIуйýб. АллóхIумма ин кунта таIламу анна хIа́зал-амра [хIоккхахь шена лууш долчу хIуманна цIе йоккхур ю] хайрун ли́ фи́ ди́ни́, ва маIáши́ ва Iáкъибати амри́, факъдурхIу ли́, ва йассирхIу ли́, сумма бáрик ли́ фи́хIи. Ва ин кунта таIламу анна хIáзал-амра [хIоккхахь шена лууш долчу хIуманна цIе йоккхур ю] шаррун ли́ фи́ ди́ни́, ва маIáши́ ва Iáкъибати амри́, фасрифхIу Iанни́, васрифни́ IанхIу, вакъдур лийалхайра хьайсу кáна, сумма ардини́ бихI» [Бухарис дийцин иза].

Хьадийсехь деъначу истихарат дуIан маьIна:

ХIай сан Дела, со Хьоьгара лохуш ву Ахь Хьайн Iилманца суна дика дар а, Хьайн ницкъаца Ахь суна ницкъ балар а. Ас Хьан боккха къинхетам а, дика а доьху Хьоьга, бакъдолуш Хьо ницкъ болуш ву, ткъа со ницкъ кхочуш вац, Хьуна хаьа, ткъа суна ца хаьа, Хьо къайлах дерг хууш верг а ву. ХIай сан Дела, нагахьсан хьун хууш дерг хIара гIуллакх (хIоккхахь шена лууш долчу хIуманна цIе йоккхур ю) суна сан динехь а, сан дахарехь а, сан тIаьхьлонехь а дика делахь, суна ницкъ луо Ахь цу гIуллакх тIехь, суна иза атта а де Ахь, тIаккхк суна цунах беркат а де Ахь. Ткъа нагахьсан Хьуна хууш дерг хIара гIуллакх (хIоккхахь шена лууш долчу хIуманна цIе йоккхур ю) суна сан динехь а, сан дахарехь а, сан тIаьхьлонехь а вон делахь, соьх дIа дерза де Ахь иза, со цунна тIера дIа а верза ве Ахь, цул диканиг дан ницкъ а ло Ахь суна, иза миччахь делахь а, юха со цунна реза а ве Ахь.