Къонаха мила ву? И меллалц веха?

«Къонаха мила ву? И меллалц веха?» - Хаьттира ахь соьга Шуьнехь 1аш вай. - Дерриг а дуьне ду Къонахчун меха. Х1ар дуьне-м къонахийн Белшаш т1ехь дай. Ламанца дин лелац, Ца хилча ленаш, Уьш кхачаделлачохь Соцуш бу дин… Иштта бу къонахий, Х1ар дуьне латтош. Къонахий д1абевлча – Духур ду и. Къонаха – дахаран Синпхенийн мерз бу. Къонаха – дуьненан Г1айг1анийн шад. Цо ларйо дахаре Вайн йолу марзо. Къонаха – пха кхосса Дуьйлина 1ад. Къонаха вехийца Даймехкан сийнна, Даймехкан сий лардеш, Вала и ле. Ле иза, кхин ваха Ца лууш сана, Ленвоцчу сийлалле Кховдаеш ц1е. Ца лууш ца ле и Вайначул ваха,- И вайна, махкана Хьалхара ле. Х1ар дуьне мел деха, Къонахий беха: 1ожало лийр йоцчу Сийлалле хьош. Терзан т1е ца дуьллу Цо деший, даьхний Халонехь хадочохь Хьуьнаран мах. Ахь дуьне мах болу Шен корта буьллу, Вайн маршо ларъечохь Саг1а дой шех. Къонахийн собар ду Лекха лам баккхал, Собар ду сов доккха, Кхача ца луш. Къонахийн собар Кхачийча-м, боккъал, Х1ар маьлхан вайн дуьне Духур ма ду. Дуьненан машарна Г1ароллехь лаьтташ, Сийлаллин таж ма ю Церан само. Къонахийн само Артъеллачу меттехь Мостаг1 ву кийча 1аш Дуьне дохо. Той кхолуш х1оттаде Боцчарна г1анташ. Дийначел дийна бу! Вайца бу уьш! Къонахийн сий хуьлда! Г1овтта вай, к1ентий, Хьакъ долу сий, хастам Царна а луш. Къийсамна хьалха бу Байракхан суьртахь, Лийр йоцчу сийлалле Шаьш дуьгуш вай… Дерриг а халкъаша Г1улч туьйсу бертахь, Доьлху уьш ирс долчу Хьалхенга шайн. «Къонаха мила ву? И меллалц веха?» - Хьаттира ахь соьга, Шуьнехь 1аш вай. - Дерриг а дуьне ду Къонахчун меха. Х1ар дуьне-м къонахийн Белшаш т1ехь дай!)